జగద్గిరిగుట్ట (న్యూస్ విధాత్రి), అక్టోబర్ 13 : జన్మదిన వేడుకల్లో స్నేహితుల మధ్య చోటు చేసుకున్న ఘర్షణ హత్యకు దారి తీసిన సంఘటన జగద్గిరిగుట్ట పోలీస్ స్టేషన్ పరిధిలో చోటుచేసుకుంది. వివరాల ప్రకారం… దీనబంధు నగర్ లో నివాసముండే నదీమ్ (24) బ్యాండ్ వాయిస్తూ జీవనం గడుపుతున్నాడు. పుట్టినరోజు వేడుకల్లో భాగంగా మద్యం సేవించిన స్నేహితుల మధ్య మాట మాట పెరిగి ఘర్షణ చోటుచేసుకుంది. దీంతో సమాచారం అందుకున్న జగద్గిరిగుట్ట పోలీసులు వారిని వారించి అక్కడి నుంచి వెళ్లగొట్టినట్లు సమాచారం. అనంతరం మద్యం మత్తులో ఒకరి ఇంటికి మరొకరు వెళ్లి మరల గొడవపడిన స్నేహితులు రాడ్డు తో తలపై కొట్టి నదీమ్ ను హత్య చేసినట్లుగా తెలుస్తుంది. ఆదివారం తెల్లవారుజాము సుమారు 3 గంటల ప్రాంతంలో నదీమ్ హత్యకు గురైనట్లు సమాచారం. ఇప్పటికే జగద్గిరిగుట్ట పోలీసులు మృతదేహాన్ని పోస్టుమార్టం నిమిత్తం ఆస్పత్రికి తరలించారు. పూర్తి వివరాలు తెలియాల్సి ఉంది.