Vidhatri News

Author: sairam

  • వచ్చే ఏడాది నుంచి ఏటా 6,500 పోస్టుల భర్తీ

    : వచ్చే జాబ్‌ క్యాలెండర్‌ నుంచి సంవత్సరానికి 6,500 చొప్పున నాలుగేళ్ల పాటు పోలీసు ఉద్యోగాలను భర్తీ చేస్తామని డీజీపీ గౌతమ్‌ సవాంగ్‌ తెలిపారు. ఆశావహులు నిరుత్సాహం చెందకుండా ఓపికతో ఉండాలని సూచించారు. ప్రస్తుతమున్న, భవిష్యత్తులో ఏర్పడే ఖాళీలను దృష్టిలో పెట్టుకొని సంవత్సరానికి అన్ని నియామకాలు చేపట్టాలని నిర్ణయించామని చెప్పారు. గ్రామ, వార్డు సచివాలయాల్లోని 15,000 మంది మహిళా సంరక్షణ కార్యదర్శులను పోలీసు శాఖలో విలీనం చేసుకున్నామని, వారికి అత్యవసరంగా శిక్షణ ఇవ్వటం తొలి ప్రాధాన్యం కావడం వల్ల తాజా జాబ్‌ క్యాలెండర్‌లో ఈ విడతకు సంబంధించిన 6,500 పోస్టులు భర్తీ తాత్కాలికంగా వాయిదా పడిందని పేర్కొన్నారు .ఒక విడతలో గరిష్ఠంగా 6,500 మందికి శిక్షణ ఇచ్చే సామర్థ్యం మాత్రమే రాష్ట్రంలో ఉందని.. మహిళా పోలీసులకు క్యాప్సుల్‌ శిక్షణ ఇవ్వటానికి కొన్ని నెలలు పడుతుందని అన్నారు. 2018 చివర్లో విడుదలైన నోటిఫికేషన్‌కు సంబంధించి ఫలితాల విడుదల, శిక్షణ, నియామకాలు అన్నీ ప్రస్తుత ప్రభుత్వ హయాంలోనే జరిగాయని 2019-20 మధ్య 3,057 మంది పోలీసులు కొత్తగా ఉద్యోగాల్లో చేరారని చెప్పారు. ఇంకా 11,000 పోస్టులు ఖాళీగా ఉన్నాయని వివరించారు. డీజీపీ ఇంకా ఏమన్నారో.. ఆయన మాటల్లోనే!

    * 15 వేల మంది గ్రామ, వార్డు మహిళా సంరక్షణ కార్యదర్శులను విలీనం చేసుకోవటంలో పోలీసు శాఖ సామర్థ్యం మరింత పెరిగింది. ప్రస్తుతం ప్రతి గ్రామంలోనూ ఓ పోలీసు ఉన్నట్టే. మహిళా భద్రతకు ఇస్తున్న ప్రాధాన్యానికి ఇది నిదర్శనం. పోలీసు శాఖలో ప్రస్తుతం 4.46 శాతం మంది మహిళలు ఉన్నారు. మహిళా సంరక్షణ కార్యదర్శులు అదనంగా వచ్చి చేరటం వల్ల ఇప్పుడు వారి సంఖ్య 33 శాతానికి పెరిగింది.

    * ప్రస్తుతం పోలీసుశాఖలోని పోస్టులకు.. అదనంగా మహిళా పోలీసు వ్యవస్థ ఉంటుంది. వారి విధులు, బాధ్యతలు, సర్వీసు నియమావళి తదితర అంశాలకు సంబంధించిన విధివిధానాలు త్వరలో ఖరారు చేస్తాం.

    * దిశ యాప్‌ను ఇప్పటివరకూ 20 లక్షల మంది డౌన్‌లోడ్‌ చేసుకున్నారు. అత్యధిక శాతం మంది డౌన్‌లోడ్‌ చేసుకున్న ప్రభుత్వ యాప్‌ ఇదే.

    * ప్రస్తుత ప్రభుత్వం గత రెండేళ్లలో 1,84,264 రెగ్యులర్‌ ఉద్యోగాలను భర్తీ చేసింది. గత ప్రభుత్వం అయిదేళ్ల కాలంలో కేవలం 34,563 ఖాళీలే భర్తీ చేసింది.

  • బక్రీద్, బోనాల నిర్వహణలో అప్రమత్తతో ఉండాలి

    *బోనాలు, బక్రీద్ పండుగలను ప్రశాంతంగా నిర్వహించాలి – డి.జి.పి మహేందర్ రెడ్డి*

    త్వరలో బక్రీద్, బోనాలు తదితర పండుగలను ఎలాంటి ఘటనలు చోటు చేసుకోకుండా ప్రశాంతంగా, శాంతియుతంగా జరిగే విధంగా తగు చర్యలు చేపట్టాలని డి.జి.పి ఎం. మహేందర్ రెడ్డి ఆదేశించారు. కోవిడ్ కారణంగా గత సంవత్సరంన్నర కాలంగా రాష్ట్రంలో ప్రధాన పండుగల నిర్వహణ జరగలేదని, లాక్ డౌన్ పూర్తిగా సడలించిన నేపథ్యంలో తిరిగి ఈ పండుగల నిర్వహణ పెద్ద ఎత్తున జరిగే అవకాశం ఉందని అన్నారు. ఈ నెలలో గోల్కొండ బోనాలు, బక్రీద్ పండుగ, ఉజ్జాయిని మహంకాళి బోనాలు, వచ్చే నెల పాత బస్తీ బోనాలు జరుగనున్నాయని అన్నారు. రెండు పండుగలు ఒకే సారి వస్తున్నందున ఏవిధమైన అవాంఛనీయ సంఘటనలు జరుగకుండా అప్రమత్తతతో ఉండాలని పోలీసు అధికారులను ఆదేశించారు. ప్రధానంగా బక్రీద్ పండుగ సందర్భంగా పశువుల రవాణా విషయంలో అవసరమైన అన్ని రకాల జాగ్రత్తలు తీసుకోవాలని చెప్పారు. ఆవులు, దూడలను రవాణా చేసేవారిపై కఠిన చర్యలు చేపట్టాలని పోలీసు అధికారులను డి.జి.పి ఆదేశించారు. పశువులను రవాణాచేసే ప్రతి వాహనానికి తగు నిర్థారిత ప్రమాణిక పత్రాలు (వాలిడ్ డాక్యుమెంట్స్) ఉండాలని స్పష్టం చేశారు. ఈ విషయంలో పోలీసు, పశుసంవర్థక శాఖ అధికారులు సమన్వయంతో పనిచేయాలని అన్నారు. ప్రతి జిల్లాలు, ఇతర రాష్ట్రాల సరిహద్దుల్లో ప్రత్యేక చెక్ పోస్ట్ లను ఏర్పాటు చేయాలని తెలిపారు. ఇతర రాష్ట్రాల నుండి రవాణా అయ్యే పశువుల విషయంలోనూ నియమ, నిబంధనలను క్షుణ్ణంగా పరిశీలించాలని ఆదేశించారు. పశుసంవర్ధక శాఖతో సమన్వయం చేసుకుంటూ గోవుల అక్రమ రవాణాపై చర్యలు తీసుకోవాలని చెప్పారు. సరైన పత్రాలు వారి వెంట ఉన్నాయనే విషయాన్ని పరిశీలించి అనుమతించాలని అన్నారు. జిల్లాల సరిహద్దులు, జిల్లా కేంద్రాలలో చెక్ పోస్టులు ఏర్పాటు చేయాలని తెలిపారు. పండుగల సీజన్ ప్రారంభమవుతున్న నేపథ్యంలో సామాజిక మాధ్యమాల ద్వారా విద్వేషాలు, రెచ్చగొట్టే పోస్టింగులు పెట్టే వారిని గుర్తించి అలాంటి వారిపై చర్యలు తీసుకోవాలని ఆదేశించారు.

  • జలజగడంపై జగన్ లేఖలు

    జలజగడంపై జగన్ లేఖ
    ఆంధ్రప్రదేశ్ ముఖ్యమంత్రి జగన్మోహన్ రెడ్డి కేంద్ర జలశక్తి మంత్రి షెకావత్‌, పర్యావరణ మంత్రి జవదేకర్‌కు లేఖ రాశారు. ఈ లేఖలో తెలంగాణపై ఆయన కీలక వ్యాఖ్యలే చేశారు. తెలంగాణ ప్రభుత్వం శ్రీశైలం, సాగర్‌, పులిచింతల జలాలను విద్యుదుత్పత్తికి వాడుకుంటోందని, కేఆర్‌ఎంబీ ఆదేశించినా వినకుండా జలాలను వినియోగించుకుంటోందని ఆ లేఖలో పేర్కొన్నారు. తెలంగాణ తీసుకొచ్చిన 34 జీవో పునర్విభజన చట్టానికి వ్యతిరేకమన్నారు. రాయలసీమకు నీరందించేందుకు ఎత్తిపోతల పథకం నిర్మిస్తున్నామని, అదనపు ఆయకట్టు లేదని, కేటాయించిన నీటినే వాడుకుంటామన్నారు.

     

    తెలంగాణ అక్రమ ప్రాజెక్టులను అడ్డుకోవాలని కేఆర్‌ఎంబీకి లేఖలు రాసినా పట్టించుకోలేదని సీఎం జగన్ పేర్కొన్నారు. పాలమూరు – రంగారెడ్డి, డిండి, కల్వకుర్తి, ఎస్‌ఎల్‌బీసీ పథకాలు నిబంధనలకు విరుద్ధమన్నారు. అక్రమ ప్రాజెక్ట్‌ల నిర్మాణాన్ని తెలంగాణ ప్రభుత్వం వేగవంతం చేసిందన్నారు. అక్రమ ప్రాజెక్టులను సందర్శించి నిలిపివేయాలని కోరినా కేఆర్‌ఎంబీ వెళ్లలేదని పేర్కొన్నారు. రాయలసీమ ఎత్తిపోతల పనుల వద్దకు వస్తామని లేఖలు రాస్తున్నారని, తమ వద్దకు వచ్చే ముందు తెలంగాణ ప్రాజెక్టులను సందర్శించాల్సిందేనని సీఎం జగన్‌ అన్నారు.

     

    అక్కడ ప్రాజెక్టులను సందర్శించకుండా ఇక్కడకు రావాల్సిన అవసరం లేదని సీఎం జగన్ స్పష్టం చేశారు. కేఆర్‌ఎంబీ పరిధిని నోటిఫై చేయాలన్నారు. ఇరు రాష్ట్రాల ప్రాజెక్టులు, రిజర్వాయర్లను కేఆర్‌ఎంబీ పరిధిలోకి తీసుకెళ్లాలని, రిజర్వాయర్లకు కేంద్ర బలగాలతో రక్షణ కల్పించాలని కోరారు. తటస్థంగా ఉండాల్సిన కేఆర్‌ఎంబీ అధికారులు తెలంగాణకు అనుకూలంగా వ్యవహరిస్తున్నారని ఆరోపించారు. ఈ అంశంపై కేఆర్‌ఎంబీ అధికారులకు తగిన సూచనలు చేయాలని కోరారు. రాయలసీమ లిఫ్ట్‌ ఇరిగేషన్‌ పనులకు పర్యావరణ అనుమతులు ఇవ్వాలని సీఎం జగన్‌ ఆ లేఖలో కోరారు.

  • కొట్టేసిన సెక్షన్66ఏ కింద కేసులా‌? ఏమిటీ దారుణం?

    కొట్టేసిన చట్టం కింద కేసులు పెడుతున్న పోలీసులపై సుప్రీం ఆగ్రహం
    ఐటి చట్టంలోని సెక్షన్ 66 (ఏ) ను కొట్టేసినా కూడా ఇంకా పోలీసులు అదే చట్టం కింద కేసులు నమోదు చేస్తుండటాన్ని సుప్రీంకోర్టు తప్పు పట్టింది. ఐటి చట్టంలోని సెక్షన్ 66 (ఏ)పై స్పష్టతనివ్వాలని పీపుల్స్ యూనియన్ ఫర్ సివిల్ లిబర్టీస్ (పీయూసిఎల్) దాఖలు చేసిన పిటిషన్ ను విచారించిన సుప్రీంకోర్టు ఈ వ్యాఖ్యలు చేసింది. నేడు కేసు విచారించిన జస్టిస్ ఆర్ ఎఫ్ నారిమన్ పోలీసుల తీరుపై ఆశ్చర్యం వ్యక్తం చేశారు. 2015 సంవత్సరంలో శ్రేయా సెహగల్ కేసులో సుప్రీంకోర్టు ఈ సెక్షన్ ను కొట్టేసిందని అయినా పోలీసులు కేసులు నమోదు చేయడం తీవ్ర ఆక్షేపణీయమని ఆయన అన్నారు. ఈ సెక్షన్ ను కొట్టివేసిన తర్వాత కూడా దేశంలోని చాలా రాష్ట్రాలలో వేలాది కేసులు నమోదు చేస్తున్నారని పిటిషనర్ల తరపు న్యాయవాది సంజయ్ పారిక్ సుప్రీంకోర్టుకు తెలిపారు.

    ఏమిటీ దారుణం!
    ఐటి చట్టంలోని 66ఏ సెక్షన్ ను 2015 లోనే సుప్రీం కోర్టు రద్దు చేసినా దేశవ్యాప్తంగా పోలీసులు అదే చట్టాన్ని, చట్టంలో రద్దు చేసిన సెక్షన్ వినియోగించి కేసులు నమోదు చేయడం దారుణమని వ్యాఖ్యలు చేసింది. ఈఏడాది మార్చి వరకూ దేశవ్యాప్తంగా 745 కేసులను 66ఏను అనుసరించి పోలీసులు నమోదు చేశారని పీయుసియల్ సుప్రీం కోర్టు దృష్టికి తెచ్చింది. ఈ విషయాన్ని విన్న సుప్రీం కోర్టు బెంచ్ ఇది దిగ్ర్భాంతి కలిగించే అంశమని పేర్కొంది. ఈ అంశంపై కేంద్ర ప్రభుత్వానికి నోటీసులు ఇచ్చింది.

    గత ఆరు సంవత్సరాలుగా ఈ చట్టంలోని 66ఏ సెక్షన్ ను పోలీసులు అమలు చేసి కేసులు పెడుతున్నారని కోర్టు దృష్టికి పిటీషనర్ తెచ్చారు.

    జిల్లా స్ధాయి నుంచి అన్ని స్ధాయిలలో ఈ సెక్షన్ రద్దు చేసిన విషయం ఎందుకు తెలియజేయలేదని కోర్టు ప్రశ్నించింది.

  • చరిత్ర తిరగ రాస్తారట, సలహాలు ఇవ్వొచ్చు

    మన పిల్లలకు తెలియని చరిత్ర పాఠాలు త్వరలో రాబోతున్నాయి. ఆ తప్పులను సరిచేస్తున్నారు..
    భారత చరిత్రలోని అన్ని కాల వ్యవధులకు సరియైన, సమానమైన రెఫరెన్స్‌లను ఇవ్వాలని చెప్పింది. అంతేకాదు మన దేశ వీరనారులు గార్గి, మైత్రేయి, ఝాన్సీ రాణి, రామచన్నమ్మ, చాంద్ బీబీ, జల్కారీ భాయ్‌ కథలను చరిత్ర పాఠాలాల్లో హైలైట్ చేయాల్సిందిగా తెలిపింది. స్కూల్ పుస్తకాల్లో మారనున్న చరిత్ర పాఠాలు. గతంలో జరిగిన కొన్ని  తప్పులను సరిచేస్తున్నారు.
    చిన్నప్పుడు స్కూల్‌లో చరిత్రను అందరూ చదివే ఉంటారు. మన దేశానికి స్వాతంత్ర్యం ఎలా వచ్చింది? ఎప్పుడు ఎవరి పాలనలో ఉండేది? ఏయే రాజులు పాలించారు? ప్రాచీన కాలంలో ప్రజల జీవిన విధానం ఎలా ఉండేది? ఇప్పుడున్న ప్రాంతాలు అప్పట్లో ఎలా ఉండేవి? ఇలా ఎన్నో అంశాల గురించి చదువుకున్నాం. ఐతే చరిత్ర పాఠాల్లో తప్పులు ఉన్నాయని, చరిత్ర వక్రీకరణ జరిగిందని అభ్యంతరాలు వచ్చాయి. ఈ నేపథ్యంలో చరిత్ర పాఠ్యాంశాల్లో తప్పుల సవరణపై పార్లమెంటరీ విద్యాశాఖ కమిటీ దృష్టిపెట్టింది. అంతేకాదు భారత చరిత్రలో మరికొన్ని అంశాలను కూడా చేర్చాలని యోచిస్తోంది. బీజేపీ ఎంపీ వినయ్ సహస్ర బుద్దే ఈ పార్లమెంటరీ కమిటీకి ఛైర్మన్‌గా వ్యవహరిస్తున్నారు. స్కూల్ చరిత్ర పుస్తకాల్లో మనదేశం గురించే మొదటగా ఉండాలని, 1975 ఎమర్జెన్సీ, 1998లో పొఖ్రాన్ అణుపరీక్షలు వంటి అంశాలను చేర్చాల్సిన అవసరం ఉందని ఆయన చెప్పారు. చరిత్ర పాఠ్యాంశాల్లో ఉన్న తప్పుల సవరణ, కొత్తగా చేర్చే అంశాలకు సంబంధించి ప్రజలు, విద్యార్థులు, ఉపాధ్యాయుల నుంచి సలహాలు, సూచనలను సేకరిస్తున్నారు.

    చరిత్ర పాఠ్యాంశాలకు సంబంధించిన సలహాలు, సూచనలు అందించేందుకు జూన్ 20 వరకు గడువు ఉండేది. ఐతే కరోనా నేపథ్యంలో చాలా మంది తమ విలువైన సూచనలను ఇవ్వలేకపోయారు. మరికొన్ని రోజుల పాటు అవకాశం ఇవ్వాలని విజ్ఞప్తులు రావడంతో… జులై 15 వరకు గడువును పొడిగిస్తూ పార్లమెంటరీ కమిటీ నిర్ణయం తీసుకుంది. చరిత్ర పుస్తకాల్లో తప్పుల సవరణ, కొత్త పాఠ్యాంశాలకు సంబంధించి రిపోర్టు ఇప్పటికే దాదాపుగా సిద్ధమైంది. కానీ సలహాలు, సూచనలను అందించేందుకు గడువును పొడిగించాలని కొందరి నుంచి విజ్ఞప్తులు వచ్చాయి. ఈ క్రమంలోనే గడువును పొడిగించాలని నిర్ణయించినట్లు కమిటీ వర్గాలు పేర్కొన్నాయి. ఎంతో కీలకమైన ఈ కార్యక్రమంలో అందరి అభిప్రాయాలను తీసుకోవాలన్నదే తమ అభిమతని వెల్లడించాయి.

    భారత చరిత్రకు వాస్తవ దూరంగా ఉన్న రెఫరెన్స్‌లతో పాటు మన దేశ హీరోల జీవిత గాథలను వక్రీరించిన పాఠాలను తొలగిస్తూ స్కూల్ పాఠ్యాంశాల్లో సంస్కరణలు తేవాలని రాజ్యసభ సెక్రటేరియెట్ జారీ చేసిన గత నోట్‌లో పేర్కొన్నారు. భారత చరిత్రలోని అన్ని కాల వ్యవధులకు సరియైన, సమానమైన రెఫరెన్స్‌లను ఇవ్వాలని చెప్పింది. అంతేకాదు మన దేశ వీరనారులు గార్గి, మైత్రేయి, ఝాన్సీ రాణి, రామచన్నమ్మ, చాంద్ బీబీ, జల్కారీ భాయ్‌ కథలను చరిత్ర పాఠాల్లో హైలైట్ చేయాల్సిందిగా తెలిపింది. చరిత్ర పాఠ్యాంశాల్లో చేయాల్సిన మార్పులు, చేర్పుల గురించి జులై 15 లోగా హిందీ లేదా ఇంగ్లీష్‌లో మెయిల్ పంపించాలని విద్యార్థులు, ఉపాధ్యాయులు, నిపుణులకు పార్లమెంటరీ కమిటీ సూచించింది. కొన్ని వర్గాలకు చెందిన చరిత్రకారులు ఉద్దేశ్యపూర్వకంగా చరిత్రకు వాస్తవ దూరంగా ఉన్న రెఫరెన్స్‌లతో మన దేశ చరిత్రను వక్రీకరించారని బీజేపీ ఎంపీ, విద్యాశాఖ పార్లమెంటరీ కమిటీ ఛైర్మన్ వినయ్ సహస్రబుద్దే ఆరోపిస్తున్నారు. వాటన్నింటినీ సవరిస్తామని ఆయన స్పష్టం చేశారు.

  • ఇసుక విధానం మార్చండి మహాప్రభో!

     

    నిత్యం ఏదో ఒక అంశంపై ప్రజలు ఎదుర్కొంటున్న ఇబ్బందులను , ప్రజల మనోభావాలను  తన లేఖల ద్వారా ముఖ్యమంత్రి వైఎస్ జగన్ మోహన్ రెడ్డి దృష్టికి తెస్తున్న నర్సాపురం ఎంపి రఘురామ రాజు ఇవాళ మరో లేఖలో ప్రభుత్వం అనుసరిస్తున్న అస్తవ్యస్త ఇసుక విధానంలో ఉన్న లోపాలు ఎత్తి చూపారు. తక్షణమే ప్రజలకు ఉపయోగపడే విధంగా ఇసుక విధానాన్ని రూపొందించాలని ఎంపి రఘురామ సూచించారు. ఈ లేఖ పూర్తి పాఠం ఇది.

    జులై 5, 2021
    శ్రీ వైఎస్ జగన్ మోహన్ రెడ్డి,
    ముఖ్యమంత్రి,
    ఆంధ్రప్రదేశ్ ప్రభుత్వం.
    విషయం: నిరాటంకంగా ఇసుక సరఫరా చేసే అంశం
    సూచిక: నవ సూచనలు (వినమ్రతతో) లేఖ 7
    ముఖ్యమంత్రి గారూ,
    రాష్ట్రంలో ఇసుక ధరలు తగ్గించేందుకు, అక్రమ ఇసుక నిల్వలు అరికట్టేందుకు, బ్లాక్ మార్కెట్ లో ఇసుక అమ్మకాలను నిలుపుదల చేసేందుకు 2019 మే నెలలో అధికారంలోకి వచ్చిన వెంటనే నూతన ఇసుక సరఫరా విధానాన్ని రూపొందించేందుకు రాష్ట్ర ప్రభుత్వం ఒక కమిటీని నియమించింది. నదీ ప్రవాహ ప్రాంతాలలో ఇసుకను తవ్వి తీస్తున్న అక్రమ తవ్వకందారులను గత ప్రభుత్వం ఉపేక్షించిందని, మధ్య దళారీలకు అనుకూలంగా గత ప్రభుత్వం వ్యవహరించిదని తద్వారా నిజమైన అవసరం ఉన్నవారికి తీరని అన్యాయం జరిగిందని మనం గత ప్రభుత్వాన్ని తీవ్రంగా విమర్శించాం.
    ఒక వైపు పర్యావరణ సమస్యలను దృష్టిలో ఉంచుకుని ఇసుక తవ్వకాలను చేపట్టడం, అదే సమయంలో సరసమైన ధరలకు ఇసుకను వినియోగదారుడికి చేరవేయడం, ఈ రెండింటితో బాటు ప్రభుత్వానికి ఆదాయం వచ్చే విధంగా చేయడమనే కీలక అంశాలను మిళితం చేసి నూతన ఇసుక సరఫరా పాలసీని రూపొందించాల్సిన అవసరం కూడా ఏర్పడింది. ఈ లక్ష్యాలను సాధించాలనే ఉద్దేశ్యంలో, జరిగిన తదనంతర పరిణామాలలో, ఇసుక సరఫరా బాధ్యతను కాంట్రాక్టర్ కు అప్పగించారు. ఆనాటి నుంచి ఇసుక కొరత మరింత తీవ్రమైంది. ఇసుక కొరత ఏర్పడటంతో దాని ప్రభావం ధరలపై పడి ఇసుక రేట్లు ఆకాశానికి అంటాయి. ఇసుక లభ్యత సన్నగిల్లడంతో రాష్ట్ర వ్యాప్తంగా నిర్మాణ రంగం స్థంభించిపోయింది. దీనివల్ల సిమెంటు, ఇనుము అమ్మకాలు తగ్గిపోయాయి. ఈ పరిణామాల ఫలితంగా రాష్ట్రంలో నిర్మాణ రంగంలో ఉపాధి అవకాశాలు దారుణంగా పడిపోయాయి. ఈ అన్ని అంశాలపై ప్రజలు గగ్గోలు పెడుతున్నారు. ఈ పరిణామాలు తలెత్తిన కొత్తలోనే నేను ఈ అంశాలన్నింటిని మీ దృష్టికి తీసుకువచ్చాను. అయితే మీరు నేను చెప్పిన విషయాలను అర్ధం చేసుకుని అందుకు పరిష్కారం ఆలోచించకుండా నన్ను అపార్థం చేసుకుని నాపై కక్ష పెంచుకున్నారు.
    ఇవన్నీ జరిగిన తర్వాత మీరు ఇంకో ఇసుక పాలసీని తీసుకువచ్చారు. మీరు తీసుకువచ్చిన ఈ రెండవ ఇసుక పాలసీ కూడా దారుణంగా విఫలమైంది. పర్యవసానంగా మీరు మూడో ఇసుక పాలసీని తీసుకురావాల్సిన పరిస్థితి ఏర్పడింది. దీనికోసం ఎంతో ఆర్భాటమైన పత్రికా ప్రకటనలు కూడా ఇచ్చారు. ఇసుక తవ్వకం, అమ్మకం నుంచి సరఫరా వరకూ జయప్రకాశ్ పవర్ వెంచర్స్ లిమిటెడ్ (JPVL) అనే ప్రయివేటు కంపెనీకి ధారాదత్తం చేశారు. ఏపి మినరల్ డెవలప్ మెంట్ కార్పొరేషన్ (APMDC) రాష్ట్రంలోని అన్ని ఇసుకరీచ్ లను ఈ కంపెనీకి కట్టబెట్టేసింది. అయితే ‘‘అంత ఉరుము ఉరిమి… ఇంతేనా కురిసింది’’ అన్నట్లు ఆ కంపెనీ 300 ఇసుక రీచ్ లలో కనీసం సగం రీచ్ లలో కూడా ఇప్పటికీ ఇసుక తవ్వకాలను ప్రారంభించలేకపోయింది.
    నూతన పాలసీ ప్రకారం ఇసుక రీచ్ ల వద్దకే వెళ్లి కొనుగోలుదారుడు ఇసుక నాణ్యత పరిశీలించుకోవచ్చు. అక్కడి ఇసుక నాణ్యత నచ్చితే దాన్ని ర్యాంప్ వద్దే కొనుగోలు చేయవచ్చు. అయితే ప్రస్తుతం పరిస్థితి ఏ విధంగా ఉందో తెలుసా? ‘‘గతి లేనమ్మకు గంజే పానకం’’ అన్నట్లుగా ఉంది.
    మధ్య దళారీల ప్రమేయం ఎట్టిపరిస్థితుల్లో ఉండదని మనం ఇచ్చిన హామీకి భిన్నంగా ఇసుక ర్యాంపుల వద్ద మధ్యదళారీల ప్రమేయమే ఎక్కువగా కనిపిస్తున్నది. రాష్ట్రంలోని అన్ని ప్రాంతాలలో ఇసుక కు ఒకే ధర ఉంటుందని మనం ఇచ్చిన హామీ కూడా ఎక్కడా అమలు జరగడం లేదు. రవాణా ఖర్చులను దృష్టిలో ఉంచుకుని ఒకే రేటు ఇవ్వలేమని ఇసుక సరఫరాదారులు చెబుతున్నారు. మీరు చేసిన మరో మేలు ఏమిటంటే అదనంగా డ్రైవర్ కు వెయిటింగ్ చార్జి భారాన్ని వినియోగదారుడిపైనే వేస్తున్నారు. దీనికి క్లీనర్, హెల్పర్ చార్జీలు కూడా అదనంగా బాదుతున్నారు. దీనికి తోడు ఇప్పుడు మరో కొత్త బెడద వచ్చిపడింది. అదేమిటంటే ‘‘జగనన్న ఇళ్ల కాలనీ’’ల అవసరాలు తీరిన తర్వాతే మిగిలిన వారికి ఇసుక సరఫరా చేస్తారట.
    ఇసుక లభ్యతను పెంచేందుకు చర్యలు తీసుకోవాల్సిన రాష్ట్ర గనులు, భూగర్భ శాఖ మంత్రి పెద్దిరెడ్డి రామచంద్రారెడ్డి ఇటీవల జరిగిన సమీక్షా సమావేశంలో అది పెద్ద అంశం కాదన్నట్లుగా మాట్లాడారు. రూ.765 కోట్ల ఆదాయం తీసుకువచ్చేందుకు తామంతా కృతనిశ్చయంగా ఉన్నామని ప్రతి ఒక్కరూ చెబుతున్నారు కానీ అక్కడ జరుగుతున్నది మాత్రం శూన్యం. మీరు తీసుకువచ్చిన ఇసుక పాలసీలో ఎక్కడ లోపం ఉంది? ఇసుక ధరలు విపరీతంగా ఎందుకు పెరిగిపోతున్నాయి? ఇసుక లభ్యత ఎందుకు తగ్గిపోతున్నది? అనే ప్రశ్నలకు మాత్రం ఎక్కడా సమాధానం దొరకడం లేదు.
    అంతా డిజిటలైజ్ చేశామని ఇక ఏ మాత్రం అవినీతి జరగదని మీరు ఎంతో నమ్మకంగా చెప్పినా కూడా రాష్ట్రంలో మొత్తం ఇసుక బ్లాక్ మార్కెట్ దందా ఎందుకు నడుస్తున్నదో అర్ధం కావడం లేదు. ఇసుక అమ్మకాలలో అవినీతి విచ్చలవిడిగా ఎందుకు పెరిగిపోయిందో కూడా అర్ధం కావడం లేదు. ఇసుక మాఫియా రాజ్యం ఏలుతూనే ఉన్నది. వీటన్నింటి పర్యవసానంగా సామాన్యుడికి ఇసుక లభ్యత తగ్గిపోతున్నది. కాపురం చేసే కళ కాళ్ల పారాణి నాడే తెలుస్తుందని ఒక సామెత ఈ సందర్భంగా గుర్తుకువస్తున్నది. ఒక్క పశ్చిమగోదావరి జిల్లాలోనే జగనన్న ఇళ్ల కాలనీల నిర్మాణానికి 37 లక్షల టన్నుల ఇసుక అవసరం అవుతుంది. వీటికి తోడు రైతు భరోసా కేంద్రాల నిర్మాణం, గ్రామ సచివాలయాలు, ఆరోగ్య కేంద్రాలు ఇతర ప్రభుత్వ భవనాల నిర్మాణానికి మరింకెంత కావాలో ఒక్క సారి అంచనా వేసుకోవచ్చు. ఈ సాధారణ లెక్కలను కూడా మన ప్రభుత్వం ఆలోచించడం లేదనిపిస్తున్నది.
    ఈ క్లిష్ట పరిస్థితుల్లో ఇసుకను సరఫరా చేయలేమని చేతులెత్తేసిన ప్రభుత్వ అధికారులు చాలా చోట్ల జగనన్న కాలనీలలో ఇళ్లను ఎవరికి వారే కట్టుకోవాలని కూడా ప్రోత్సహిస్తున్నారని అంటున్నారు. ఇలా ఎవరికి వారు తక్షణమే ఇళ్లు నిర్మించుకోవడం మొదలు పెట్టాలని, లేకపోతే వారి పట్టాలు రద్దు చేసి వేరొకరికి కేటాయించేస్తామని చాలా చోట్ల బెదిరిస్తున్నట్లు పత్రికలలో పుంఖానుపుంఖాలుగా వార్తలు వెలువడుతున్నాయి.
    ఈ సందర్భంగా మీ తెలివితేటలను నేను అభినందించకుండా ఉండలేకపోతున్నాను. కేంద్ర ప్రభుత్వం MNREGA నిధుల నుంచి రోడ్లు ఇతర సౌకర్యాల కల్పనకు నిధులు ఇస్తున్నా, ప్రధాన మంత్రి ఆవాస్ యోజన కింద ప్రతి ఇంటి నిర్మాణానికి 1.5 లక్షల చొప్పున ఆర్ధిక సాయం అందిస్తున్నా కూడా ఈ స్కీమ్ మొత్తానికి మీ పేరు పెట్టుకుని ‘‘జగనన్న ఇళ్ల కాలనీలు’’ అంటూ మొత్తం క్రెడిట్ ను మీరే సొంతం చేసుకోవడానికి మీరు వేసిన ఎత్తుగడను ఈ సందర్భంగా మిమ్మల్ని అభినందించకుండా ఉండలేకపోతున్నాను.
    పాపం ప్రజలు అందరూ కూడా పేద వారిపై ఎంతో ప్రేమతో మొత్తం ఖర్చు మీరే భరిస్తున్నారని అనుకుంటున్నారు. మీ ‘‘జగనన్న కాలనీ’’లో ఎక్కువ భాగం కేంద్ర ప్రభుత్వం నుంచే వస్తున్నదని ఏదో ఒక మూలనన్నా చెబితే బాగుంటుందేమో ఆలోచించండి. ఇలా తెలిసీ తెలియనట్లు, చూచాయగా చెప్పినా కూడా కేంద్ర నుంచి మరిన్ని నిధులు తెచ్చుకోవడానికి అది ఉపయోగపడుతుంది. మన ప్రజలకు మరింత సంక్షేమాన్ని అందించేందుకు దీనివల్ల మరింత వీలుకలుగుతుంది. అలా అదనంగా వచ్చే కేంద్ర ప్రభుత్వ స్కీమ్ లకు కూడా మనం ‘‘జగనన్న’’ పేరు పెట్టుకుంటే మన ప్రజలు మరింతగా సంతోష పడతారు.
    అవసరమైనంత ఇసుకను సరసమైన ధరలో అందించే విధంగా మీ విధానం ఉంటే చాలని ప్రజలు కోరుకుంటున్నారు. మీరు ఇచ్చే ఉచిత ఇసుక పథకం వద్దు బాబోయ్ అంటూ వారు గగ్గోలు పెడుతున్నారు. మీరు మూడు నాలుగు ఇసుక పాలసీలు తీసుకువచ్చి పరిస్థితి మరింత దారుణంగా మార్చడాన్ని చూసిన ప్రజలు ఏమనుకుంటున్నారో తెలుసా? ‘‘ అంచు డాబే కానీ పంచె డాబు లేదు’’.
    అందువల్ల మీరు తక్షణమే మీ ప్రియమైన ఇసుక పాలసీని ఇప్పటికైనా మార్చుకోండి. సరసమైన ధరకు నాణ్యమైన ఇసుకను అవసరం ఉన్నంత పరిమాణంలో సరఫరా చేసేందుకు చర్యలు తీసుకోండి. తద్వారా రాష్ట్రంలో మళ్లీ నిర్మాణ రంగం పుంజుకునే విధంగా చర్యలు తీసుకోండి. మీరు ఇలా చేయడం వల్ల రాష్ట్రంలో నిర్మాణ రంగం మళ్లీ ఊపందుకుంటుంది. నిర్మాణ రంగం మళ్లీ తన కార్యకలాపాలు ప్రారంభిస్తే ఎంతో మందికి ఉపాధి కలుగుతుంది. పేద వారు కష్టపడి పని చేసుకుని తమ జీవితాన్ని కొనసాగిస్తారు.
    సమాజంపై ఎంతో ప్రభావం చూపుతున్న మీ ఇసుక పాలసీని తక్షణమే మార్చుకుంటారని తద్వారా రాష్ట్రంలో ఆర్ధిక కార్యకలాపాలు ఊపందుకునేలా చేస్తారని ఆశిస్తూ….
    భవదీయుడు
    కె.రఘురామకృష్ణంరాజు

  • ఆర్ధిక పరిస్థితులు చక్కదిద్దకపోతే అధోగతే:ఎంపి రఘు

    యధావిధిగా ఎంపీ రఘురామ రాజు ప్రభుత్వం తన ఉద్యోగుల కు జీతాలు, వేతనాల చెల్లింపులో జరుగుతున్న జాప్యాన్ని తగ్గించాలని కోరుతూ మరోలేఖను ముఖ్యమంత్రి వైయస్ జగన్మోహన్ రెడ్డికి రాశారు. ఆ లేఖలో ఇంకా ఏమన్నారంటే
    మన రాష్ట్రంలో పని చేస్తున్న 4,43,711 మంది ప్రభుత్వ ఉద్యోగులకు జీతం చెల్లించే గడువు తేదీ ప్రతి నెలా ఒకటో తేదీ దాటిపోతున్నది. ప్రతి నెలా పదో తేదీ వరకూ వారికి విడతల వారీగా జీతం చెల్లింపులు చేస్తున్నారు. అంతే కాదు, 2,88,480 మంది ఉపాధ్యాయులకు జీతాల చెల్లింపు కూడా వాయిదాలు పడుతూ ఇప్పటికే నెల రోజుల బకాయితో నడుస్తున్నది. రాష్ట్రంలోని 3.5 లక్షల మంది పెన్షనర్లకు అయితే నెలలో మూడో వారం వరకూ చెల్లింపులు జరగడం లేదు. జీతాల చెల్లింపు కోసం రూ.3500 కోట్లు, పెన్షన్ల చెల్లింపు కోసం నెలకు రూ.2500 కోట్లు, ఈ చెల్లింపుల కోసం తీసుకువచ్చిన అప్పులకు వడ్డీ భారం రూ 3,000 కోట్లు… ఇలా చూస్తే నెలకు రూ.9,000 కోట్లు ప్రభుత్వానికి అవసరం అవుతున్నాయి.
    మీ నేతృత్వంలో అధికారంలో ఉన్న ప్రభుత్వం గత రెండేళ్లుగా ఏనాడూ ఆర్ధికంగా బాగాలేదు. ప్రస్తుతం ప్రభుత్వ ఉద్యోగుల జీతభత్యాలు కూడా చెల్లించలేని తీవ్రమైన వత్తిడిలోకి వచ్చేశాం. మధ్యలో శెలవుల రావడం వల్ల జీతాలు సకాలంలో చెల్లించలేక పోతున్నామని, కరోనా కారణంగా జీతాల చెల్లింపు ఆలశ్యం అవుతున్నదని ఇంతకాలం కుంటి సాకులు చెబుతూ మన వైఫల్యాన్ని కప్పిపుచ్చుకుంటూ వచ్చాం. ప్రభుత్వం నుంచి సకాలంలో జీతాలు రాకపోవడంతో ప్రభుత్వ ఉద్యోగులు తీవ్రమైన మానసిక వత్తిడికి గురి అవుతున్నట్లు ప్రస్తుత పరిస్థితి సూచిస్తున్నది. ఈ పరిస్థితి ఇలాగే ఇంకా కొనసాగితే ప్రభుత్వ ఉద్యోగాలకు దరఖాస్తు చేసేవారే ఉండరేమోననే అనుమానం నాకు కలుగుతున్నది. నిరుద్యోగులలో ఈ భావన కలిగించడానికే ప్రభుత్వం ఈ విధంగా చేస్తున్నదని నేనైతే అనుకోవడం లేదు.
    గురు బ్రహ్మ గురు విష్ణు
    గురుదేవో మహేశ్వరహ:
    గురు సాక్షాత్ పరబ్రహ్మ
    తస్మై శ్రీగురవేనమ:
    మన దేశంలో ఉపాధ్యాయులను సాక్షాత్తూ పరబ్రహ్మ స్వరూపులుగా భావిస్తుంటాం. అలాంటి వారికే మనం జీతాలు చెల్లించలేని దుస్థితిలో ఉన్నాం. ఈ విధమైన పరిస్థితి నెలకొని ఉండటం రాష్ట్ర ప్రభుత్వానికి మంచిది కాదు. ఉపాధ్యాయులకు గౌరవం ఇవ్వడంలో ప్రపంచ దేశాలతో పోలిస్తే మన దేశం 8వ స్థానంలో ఉన్నది. అదే భగవత్ స్వరూపులైన గురువులకు వేతనాలు చెల్లించడంలో ప్రపంచంలోనే 26వ స్థానంలో ఉన్నాం. అలాంటిది ఆంధ్రప్రదేశ్ లో ఉపాధ్యాయులకు చెల్లించే జీతాలు కూడా బకాయిలు పెడుతున్నామంటే అది ఎంత హీనమైనదో అర్ధం చేసుకోండి. భావితరాలను తీర్చి దిద్దే గురుతర బాధ్యతను నెత్తిన పెట్టుకుని మోసే ఉపాధ్యాయులకు ఈ విధంగా చేయడం మీకు భావ్యం కాదు.
    151 అసెంబ్లీ స్థానాలతో అప్రతిహత విజయం సాధించి మన ప్రభుత్వం అధికారంలోకి రావడానికి ప్రభుత్వ సిబ్బంది ఎంతో కీలకపాత్ర పోషించిన విషయం మనం మరచిపోకూడదు. ‘‘ఏరు దాటేదాకా ఓడ మల్లన్న ఏరు దాటిన తర్వాత బోడి మల్లన్న’’ అన్న చందంగా వ్యవహరిస్తూ వారికి సకాలంలో జీతాలు చెల్లించకపోవడం సహించరాని విషయం. సాధారణంగా ఏ ప్రభుత్వం అయినా సరే ప్రతి నెల 1వ తేదీన ఉద్యోగులకు జీతాలు చెల్లించి ఆ తర్వాతే మిగిలిన ఖర్చులు చూసుకుంటుంది. అయితే మీరు నేరుగా క్యాష్ ఇచ్చే స్కీమ్(నగదు పంపిణీ పధకాలపై) లపైనే ప్రత్యేక శ్రద్ధ చూపిస్తున్నారు. కేంద్ర ప్రభుత్వం నుంచి వచ్చే నిధులు కూడా ఈ విధంగానే ఖర్చు అయిపోతున్నాయనే భావనలో ప్రజలు ఉన్నారు.
    ఎంతో సహృదయంలో గత రెండు సంవత్సరాలుగా జీతాలు సకాలంలో రాకపోయినా సహనంతో ఉన్న ప్రభుత్వ ఉద్యోగులు ఇలానే కలకాలం ఉంటారని మీరు భావిస్తే అది తప్పు అవుతుంది. మనమేదో యూనియన్ నాయకులను మేనేజ్ చేసి ఇప్పటి వరకూ ప్రభుత్వ ఉద్యోగుల నోరు మూయించినట్లు ఇక రాబోయే రోజుల్లో కుదరకపోవచ్చు. ఇప్పటికే మీ పోకడలను గమనిస్తున్న వారు కూడా మీ నాయకత్వాన్ని ‘‘ఆపదలో మొక్కులు… సంపదలో మరపులు’’ అనే అనుకుంటున్నారు.
    తెలుగులో ‘‘అత్త సొమ్ము అల్లుడు దానం’’ అన్న సామెత చెప్పినట్లు, కేంద్ర ప్రభుత్వం నుంచి వస్తున్న నిధులు, గ్రాంట్లు అన్నీకూడా మీ పేరుతో అమలు చేస్తున్న సంక్షేమ పథకాలకు మళ్లిస్తున్నట్లుగా ప్రజలకు ఇప్పటికే అర్ధం అయింది. ఉద్యోగులకు, టీచర్లకు జీతాలు, భత్యాలు ఇవ్వడమనే ప్రాధాన్యతాంశాన్ని మీరు ఉద్దేశ్యపూర్వకంగానే మరచిపోతున్నారు. గత ఏడాది కాలంగా మీరు ఉద్యోగులకు మెడికల్ రీయంబర్స్ మెంట్ డబ్బులు కూడా చెల్లించడం లేదు. గత రెండు సంవత్సరాలుగా మీరు గృహనిర్మాణ భత్యం (హౌస్ బిల్డింగ్ ఎలెవన్స్- హెచ్ బి ఏ) కు అనుమతులు ఇవ్వడం లేదు. దీని కోసం బడ్జెట్ కేటాయింపులు తగ్గించడం ద్వారా మీరు మీ నిజస్వరూపాన్ని బయటపెట్టుకుంటున్నట్లుగా అనుకోవాల్సి వస్తుంది…. ‘‘అద్దం అబద్ధం ఆడుతుందా?’’
    ప్రభుత్వం కోసం కష్టపడి పని చేస్తున్న ఉద్యోగులకు, విద్యార్ధుల భవిష్యత్తును తీర్చిదిద్దే ఉపాధ్యాయులకు జీతభత్యాలు ఇవ్వకుండా మనం చేస్తున్నది ఏమిటంటే ఆర్భాటంగా హెలికాప్టర్లకు, ప్రత్యేక విమానాలకు అద్దెలు చెల్లించడం. నెలలో ఒక సారో రెండు సార్లో ప్రయాణం చేసేందుకు వినియోగించే హెలికాప్టర్, ప్రత్యేక విమానం అద్దెకు తీసుకోవడం అంత అవసరమా? ఇలా చేయడానికి ఏ లాజిక్ ఉందో అర్ధం కావడం లేదు సరికదా ఇలా చేయడాన్ని ప్రజలు ‘‘నిధుల దుర్వినియోగం’’ అని అంటున్నారు. వీటితోబాటు న్యాయస్థానాలలో మనం గెలుస్తామో లేదో తెలియని, గెలవడానికి ఏ మాత్రం అవకాశం లేని కేసులలో వాదించేందుకు ఎంతో ప్రజాధనాన్ని ఖర్చు చేస్తున్నారు.
    ఆలశ్యం… అమృతం విషం.. ఇప్పటికైనా సత్వరమే స్పందించండి. మీ ప్రాధాన్యతలు మార్చుకోండి. ఉద్యోగులకు, ఉపాధ్యాయులకు జీతాలు చెల్లించడాన్ని ప్రధమ ప్రాధాన్యంగా పెట్టుకోండి. సుప్రీంకోర్టు తీర్పును గౌరవించి ఉద్యోగులకు చెల్లించాల్సిన భత్యాలను, అడ్వాన్సులను తక్షణమే వడ్డీతో సహా చెల్లించండి. రాష్ట్రానికి రాబడి తెచ్చే విషయాలను ఇప్పటికైనా ఆలోచించండి. కేవలం మీ పేరుతో అమలు చేసుకునే సంక్షేమ పథకాలకు నిధులు ఖర్చు మాత్రమే చేసే విషయాలపై పునరాలోచించండి. ఆర్ధిక క్రమశిక్షణ లేని ఈ స్థితి నుంచి బయటపడేందుకు ఇప్పటికైనా ప్రయత్నించండి. అలా కాకుండా మీరు ఇదే విధమైన పరిస్థితిని కొనసాగిస్తే రాష్ట్రం మరింత ఆర్ధిక సంక్లిష్టతలో చిక్కుకుంటుంది.

  • ఒక్కో పిటీషన్ తేల్చుతాం: హైకోర్టు

    ఒక్కొక్కటిగా నిందితుల పిటిషన్లను తేలుస్తాం
    జగన్‌ కేసుల్లో సీబీఐని ఆదేశించిన హైకోర్టు

     ఆంధ్రప్రదేశ్‌ ముఖ్యమంత్రి వై.ఎస్‌.జగన్‌మోహన్‌రెడ్డి అక్రమాస్తుల వ్యవహారంలో తమపై నమోదైన కేసులను కొట్టేయాలంటూ నిందితులు దాఖలు చేసిన పిటిషన్లపై కేసుల వారీగా జాబితా సమర్పించాలంటూ సీబీఐని హైకోర్టు శుక్రవారం ఆదేశించింది.

    జగన్‌ అక్రమాస్తుల కేసులో హెటిరో, అరబిందో కేసులో నిందితులైన హెటిరో డైరెక్టర్‌ ఎం.శ్రీనివాసరెడ్డి, హెటిరో కంపెనీలతోపాటు లేపాక్షి నాలెడ్జ్‌ హబ్‌లో నిందితుడైన శ్రీనివాస బాలాజీ, ఇందూ-గృహ నిర్మాణ మండలి కేసులో నిందితులైన జితేంద్ర వీర్వాణి, ఎంబసీ రియల్టర్స్‌ దాఖలు చేసిన వేర్వేరు డిశ్ఛార్జి పిటిషన్లపై శుక్రవారం జస్టిస్‌ షమీమ్‌ అక్తర్‌ విచారణ చేపట్టారు. హెటిరో తరఫున సీనియర్‌ న్యాయవాది టి.నిరంజన్‌రెడ్డి వాదనలు వినిపిస్తూ ఇండియా సిమెంట్స్‌ ఎండీ శ్రీనివాసన్‌పై కేసును ఇదే కోర్టు కొట్టివేసిందన్నారు. దీనిపై సీబీఐ సుప్రీంకోర్టును ఆశ్రయించిందని, అక్కడ ఎలాంటి స్టే మంజూరు కాలేదన్నారు. ఇదే తీర్పు అన్ని కేసులకూ వర్తింపజేయవచ్చని, సునీల్‌ భారతి మిత్తల్‌ కేసులోనూ సుప్రీంకోర్టు కంపెనీ చర్యలకు ఎండీ బాధ్యుడు కాదని చెప్పారన్నారు. జగతి, జనని ఇన్‌ఫ్రాల్లో రూ.100 నుంచి ఎంత పెట్టుబడి పెట్టినా కేసులు పెట్టారన్నారు. పెట్టుబడి పెట్టడం నేరమంటే ఎలాగని, ఇండియా సిమెంట్స్‌లో కంపెనీలో 26,000 మంది వాటాదారులు పెట్టుబడి పెట్టడానికి అంగీకరించారని, బోర్డు తీర్మానం మేరకే పెట్టుబడులు పెడతారన్నారు. సీఎం కుమారుడి కంపెనీ అయినంత మాత్రాన పెట్టుబడి పెట్టకూడదని ఏమీ లేదని, రేపు మరో సీఎం కుమారుడు కంపెనీ పెట్టినా పెట్టుబడులు పెట్టవచ్చన్నారు. ఈ కేసులపై రాజకీయాల ప్రభావం ఉందని చెప్పారు. హెటిరోను మెడిసిటీగా అభివృద్ధి చేశామని, భూమి కేటాయింపులు జరిపారని, లీజు రద్దు చేయలేదని, భూమిని వెనక్కి తీసుకోలేదన్నారు. 3 వేల మంది ఉపాధి పొందుతున్నారని, వేల కోట్ల రూపాయల విదేశీమారక ద్రవ్యం సమకూరుతోందన్నారు. ప్రస్తుత కొవిడ్‌ సమయంలో మందుల తయారీ కీలకమని, కేసుల పేరుతో ఇబ్బందులకు గురిచేయడం సరికాదన్నారు.

    రాజకీయాలతో సంబంధం లేదు

    – సీబీఐ న్యాయవాది సురేందర్‌

    జ గన్‌ కేసుల్లో రాజకీయాల ప్రభావం ఉందని చెప్పడం సరికాదని సీబీఐ తరఫు న్యాయవాది కె.సురేందర్‌ తెలిపారు. 11 అభియోగపత్రాలు దాఖలు చేశామని, ప్రతి కేసులోనూ వేర్వేరు అంశాలున్నాయని, ఒకదాంతో మరోదానికి సంబంధం లేదన్నారు. ఇండియా సిమెంట్స్‌ కేసులో వాస్తవాలు వేరని, ఆ తీర్పు అన్నింటికీ వర్తింపజేయడం సరికాదన్నారు. ఇండియా సిమెంట్స్‌ కేసులోని అంశాలను ఆధారంగా తీసుకుని ఎండీపై కేసును కొట్టేశారన్నారు. జగన్‌ కేసుల్లో మొత్తం 103 మంది దాకా నిందితులు ఉన్నారని, కేసును కొట్టేయాలంటూ పలువురు పిటిషన్లు వేశారన్నారు. ఈ దశలో పిటిషనర్ల తరఫు న్యాయవాది జోక్యం చేసుకుంటూ సీబీఐ కేసులతోపాటు ఈడీ కేసులూ ఉన్నాయన్నారు. అవి మరో న్యాయమూర్తి ముందు ఉన్నాయన్నారు. దీనిపై న్యాయమూర్తి జోక్యం చేసుకుంటూ ముందు తనవద్ద ఉన్న సీబీఐ కేసులన్నింటిలో విచారణ పూర్తి చేస్తానని, కేసుల వారీగా జాబితా ఇస్తే ఒక్కో దానిపై విచారణ చేపడతానన్నారు. మూడు వారాల్లో జాబితా సమర్పించాలని సీబీఐని ఆదేశిస్తూ విచారణను వాయిదా వేశారు.

     

  • ఏయులో విజయసాయిరెడ్డి జన్మదిన వేడుకలా?

    అమరావతి/విశాఖపట్నం

    జగన్ పాలనలో విశ్వవిద్యాలయాలు రాజకీయ పునరావాస కేంద్రాలుగా మారాయి

    రాజకీయాలకు అతీతంగా ఉండాల్సిన విశ్వవిద్యాలయాలను జగన్ రెడ్డి పాలనలో రాజకీయ పునరావాస కేంద్రాలుగా మార్చారని టీడీపీ జాతీయ ప్రధాన కార్యదర్శి, ఎమ్మెల్సీ, శ్రీ నారా లోకేశ్ మండిపడ్డారు.

    11 కేసుల్లో నిందితుడుగా ఉన్న A2 రెడ్డి జన్మదిన వేడుకలు ఆంధ్ర విశ్వవిద్యాయలంలో నిర్వహించటం దారుణమన్నారు.

    రాజకీయాలకు అతీతంగా ఉండాల్సిన విశ్వవిద్యాలయాలు జగన్ రెడ్డి పాలనలో రాజకీయ పునరావాస కేంద్రాలుగా మారాయని తెదేపా జాతీయ ప్రధాన కార్యదర్శి నారా లోకేశ్ విమర్శించారు.

    ఎంతో మందిని గొప్ప వ్యక్తులుగా తీర్చిదిద్దిన చరిత్ర ఆంధ్ర విశ్వవిద్యాలయానికి ఉందని.. అలాంటి చోట, 11 కేసుల్లో నిందితుడుగా ఉన్న A2 రెడ్డి జన్మదిన వేడుకలు నిర్వహించడం దారుణమన్నారు.

    ★ దొంగల జీవితాలను ఆదర్శంగా తీసుకోమని బంగారు భవిష్యత్తు ఉన్న విద్యార్థులకు వీసీ స్వయంగా చెప్పటం దురదృష్టకరమని ధ్వజమెత్తారు.

  • చౌతాలా తొమ్మిదిన్నర ఏళ్ళ జైలు శిక్ష తర్వాత విడుదల

    న్యూఢిల్లీ: టీచర్ రిక్రూట్‌మెంట్ కుంభకోణంలో పదేళ్ల పాటు జైలుశిక్ష అనుభవించిన హర్యానా మాజీ ముఖ్యమంత్రి, ఇండియన్ నేషనల్ లోక్ దళ్ అధ్యక్షుడు ఓం ప్రకాశ్ చౌతాలు శుక్రవారంనాడు తీహార్ జైలు నుంచి విడుదలయ్యారు. ఇందుకు సంబంధించిన లాంఛనాలు అన్నీ పూర్తి కావడంతో ఆయన తీహార్ జైలు నుంచి విడుదయ్యారని జైలు అధికారులు తెలిపారు. 86 ఏళ్ల చౌతాలా ఇప్పటికే పెరోల్‌పై బయట ఉన్నారు. శుక్రవారంనాడు ఆయన జైలుకు వచ్చి లాంఛనాలు పూర్తి చేయడంతో విడుదలకు మార్గం సుగగమైంది. పదేళ్ల శిక్షలో తొమ్మిదిన్నరేళ్ల శిక్ష అనుభవించడంతో పాటు కోవిడ్ పరిస్థితిలో జైలులో ఇరుకు వాతావరణాన్ని దృష్టిలో ఉంచుకుని ఢిల్లీ హైకోర్టు గత నెలలో ఆయనకు ఆరు నెలల జైలుశిక్షను తగ్గించింది.

    చౌతాలా ఇప్పటికే తొమ్మిదేళ్ల తొమ్మిది నెలల జైలు అనుభవించినందున ఆయన జైలు నుంచి విముక్తి పొండడానికి అర్హులని అధికారులు తెలిపారు.

    టీచర్ల రిక్రూట్‌మెంట్ స్కామ్‌లో 2013లో చౌతాలా జైలుకు వెళ్లారు. కోవిడ్ నేపథ్యంలో 2020 మార్చి 23 నుంచి ఆయన ఎమర్జెన్సీ పరోల్‌లో ఉన్నారు. 2021 ఫిబ్రవరిలో ఆయన సరెండర్ కావాల్సి ఉండగా, ఆయన పరోల్‌ను హైకోర్టు ఆరు నెలలు పొడిగించింది. ఫిబ్రవరి 21 నాటికి రెండు నెలల 26 రోజుల పాటు మిగిలి ఉన్న జైలుశిక్షను కోర్టు తగ్గించింది. కాగా, సంక్షోభ సమయంలో తమ కుటుంబం కోసం ప్రార్ధించి, ప్రేమాభిమానాలు చూపించిన అందరికీ తాము రుణపడి ఉంటామని చౌతాలా చిన్న కొడుకు అభయ్ అన్నారు. చౌతాలా మనుమడు దుష్యంత్ 2018లో ఐఎన్ఎల్‌డీని విడిచి జననాయక్ జనతా పార్టీని స్థాపించారు. ఓంప్రకాష్ చౌతాలా విడుదల కావడం తమకెంతో సంతోషంగా ఉందని అన్నారు. జైలు నుంచి విడుదల అయిన అనంతరం చౌతాలా నేరుగా గురుగావ్‌లోని తన నివాసానికి చేరుకున్నారు.